6 - 8 Deireadh Fómhair 2017

Fáilte go Féile na Sollán 2017!



Fáilte go Féile Na Sollán 2017, céiliúradh deireadh seachtaine de cheol agus de chultúr traidisiúnta na hÉireann agus dár dteanga náisiúnta féin, eagraithe sna Solláin idir 6 go 8 Deireadh Fómhair. Is é seo an cúigiú huair go mbeidh an fhéile seo againn, agus táimid ar bís sceideal d‘imeachtaí atá lán go béal a chur i láthair, ina measc scoth an ceoil traidisiúnta i ngach ceann de na tithe tábhairne i rith na deireadh seachtaine, céilí pobail i halla an pharóiste, ceardlann drumadóireachta, turas báirse ar an gCanáil Mhór, ealaíon agus ceardaíocht, scéalaíocht do na páistí óga, agus seó clainne le Guido Fanzini, fear atá iomlán craiceáilte!


Bíonn ceolchoirm oíche Shathairn mar phríomhimeacht na féile i gcónaí, agus i mbliana táimid ar bís go mbeidh FullSet ar an ardán sa Bridgewater Inn, ócáid a gheallann taithí fuaime den scoth don lucht éisteachta. Tá FullSet ar cheann de na bannaí is cumasaí agus is mó éilimh i saol an cheoil traidisiúnta Ghaelaigh sa lá atá inniu ann. Cruthaíonn an grúpa óg, spleodrach seo fuaim atá lán d’fhuinneamh agus molaim daoibh gan iad a chailleadh! Is pribhléid dúinn gurb iad FullSet atá mar phríomhimeacht na féile dúinn.


Is céiliúradh é Féile na Sollán dár dteanga náisiúnta féin chomh maith le neart imeachtaí trí mheán na Gaeilge eagraithe, cosúil le Caifé agus Ceol, Gradam na Sollán, ealaíon agus ceardaíocht do pháistí agus an seó clainne spraoiúil le Guido Fanzini.  Molaimid do lucht na féile uilig cuid spraoi a bheith acu, dul i spiorad na féile agus trial a bhaint as pé Gaeilge atá agaibh a úsáid ag aon cheann de na himeachtaí.


I mbliana beidh imeachtaí nua againn i rith na féile, ina measc taispeántas de rince gaelach ó scoil rince Sutton, gig faoin aer le banna cheoil Cathú ó Dhroichead Nua,  chomh maith leis an grúpa iontach de phíobairí, an Narraghmore Pipe Band, a sheinnfidh ar bhruach an Canála Mhóir trathnóna dé Sathairn. Cuirfimid críoch leis an deireadh seachtaine le seisiún ceoil ar leith ag ár gclabhsúr traidisiúnta sa Railway Inn, faoi stiúr ár ngrúpaí traidisiúnta Sult agus Fonn Nua chomh maith le cuid aíonna speisialta inár gcuideachta.


Focal buíochais ar leith dár gcoiste as ucht an dianobair atá déanta acu, dár n-urraí Comhairle Chontae Cill Dara, Éire Íldánach agus do na gnóthaí áitiúla uilig a thug tacaíocht dúinn trí fhógraíocht sa chlár agus trí dhuaiseanna a chur ar fáil don chrannchur.

 

Tá súil againn go nglacfaidh sibh páirt i gcuid de na himeachtaí ar fad a bheidh ar siúl agus go mbeidh deireadh seachtaine againn nach ndéanfar dearmad air choíche. Tá na sonraí ar fad ar ár suíomh ghréasáin, áít a aimseofaí liosta iomlán na n-imeachtaí nó go bhféadfaí ticéid a cheannach d’aon imeacht gur gá ticéid dó.


Táimid ag tnúth go mór le casadh libh ann. Bainigí sult as!


Daithí de Faoite,

Cathaoirleach na Féile


English